夏蕙姨探學生 盼以和為貴

【明報專訊】旺角佔領現場氣氛火爆，但偶有輕鬆場面，藝人黃夏蕙（網民稱「夏蕙BB」）噚日下午3時半左右去咗旺角集會現場，呼籲學生珍惜生命。夏蕙姨話學生係未來主人翁，佢喺附近拍戲，所以同朋友一齊探望學生，「希望佢哋珍惜生命，來日方長，係咪先？最緊要係呢段時間，能夠留番佢哋嘅性命，仲有好多嘢可以做嘅」。佢話希望學生「算啦，唔好搞咁多嘢」，至於佢係咪支持學生，佢就話呢啲嘢佢唔係好識，又話見到旺角混亂感到好驚，希望大家「以和為貴，有乜嘢事慢慢講啦」。


陪同夏蕙姨嘅朋友就話，夏蕙姨唔會偏幫任何一方，只係關心學生，想大家珍惜生命。


乙武洋匡去旺角 受港青感動

另外，天生無四肢、撰寫自傳《五體不滿足》嘅日本名人乙武洋匡及其男友人，噚日都現身旺角，其友代為翻譯話，佢哋來港，前晚已去過金鐘感受港人爭取民主嘅氣氛，噚日第一次去旺角。佢話雖然喺日本睇新聞知道旺角有多次衝突，但仍想前嚟睇睇。佢覺得旺角形勢比金鐘複雜，有少少危險，但由於佢逗留一陣會離開，所以無帶保護裝備 。


乙武洋匡話被香港青年嘅熱情感動，因為日本青年對政治不感興趣，偏向服從指令，所以香港佔領行動喺日本好少見。