佔領忽然「嘉年華」

【明報專訊】噚日係國慶公眾假期，銅鑼灣、金鐘嘅佔領區有啲似嘉年華會，點解？除咗一直留守嘅社運人士、學生哥，仲有唔少人一家大細嚟感受下佔領馬路嘅滋味，並喺政府總部外觀看其他人綁喺圍欄上嘅黃絲帶。市民鄭先生話，趁住兩個小三同小一嘅囝囝放假，第一次全家一齊參加社會運動。


佢話近日喺屋企有同囝囝睇新聞並解釋，又話會以比賽比喻選舉制度，長子有時會提出問題，細仔暫時未能完全了解。另有市民帶愛犬一同前往，並為小狗繫上黃絲帶，吸引唔少人圍觀。下午就有10多名基督徒唱詩歌，又誦讀經文，有市民停步欣賞、拍照。


立法會對出迴旋處一夜之間出現咗件藝術品，Emily問過有份製作呢件藝術品嘅城大創意媒體學院劉同學，佢話作品係佢同一班同學齊齊通宵趕製，名叫《聚傘樹》。上面嘅雨傘代表市民，下面嘅鐵馬就代表警察，兩者要互相支撐，希望表達警民雙方其實都要互相配合嘅意念。