單仲偕發火 舌戰維園阿伯

【明報專訊】民主黨單仲偕噚日出席港台《城市論壇》時，唔知係咪受到學生公民抗命影響，平日斯斯文文嘅單仲偕表現好激動，好幾次嗌咪同「維園阿伯」、「維園阿嬸」疊聲針鋒相對，為學生抱不平，強調係因為政府喺「公民廣場」加設3米高嘅圍欄，先逼到學生爬牆重奪「公民廣場」。單仲偕話因為警察步步進迫，先令到市民反抗，強調學生都係高舉雙手去表示無意衝突。


除咗維園阿伯、維園阿嬸，單仲偕仲插嘴駁斥工總主席劉展灝，因為劉展灝話人大常委嘅政改決定下，泛民都仲可以「入閘」。呢句話激到單仲偕差啲反枱，佢仲插嘴大嗌「我哋唔係擔心邊個入到入唔到……而係個制度唔公平」。劉展灝都不甘示弱，反駁話普選係無國際標準，重申特首唔可以同中央對抗。