作家孤泣獲獎 憶起30次失敗

【明報專訊】由香港流行圖書出版協會及荷里活廣場合辦嘅第一屆「香港金閱獎」噚日頒發46個獎頂，表揚傑出作家，「最佳書籍」獲獎作家包括大家熟悉嘅中大校長沈祖堯、天文台前台長林超英、愛情小說作家鄭梓靈和張小嫻，仲有「紅Van」作者Pizza。而孤泣同鄺俊宇就拎咗「我最喜愛作家」銀獎及銅獎。


孤泣以網絡小說起家，佢會考成績唔理想，做過推銷員，熱愛寫作嘅佢試過投稿畀30家出版社，但全部失敗，最後佢決定將小說放上網，擁有咗一批網絡讀者。孤泣之後就過住日頭返工、夜晚寫稿嘅生活，直到年半前做全職作家。雖然辛苦，但對孤泣嚟講，寫作先係佢嘅主業，返工係副業。


網絡紅起 出版社番轉頭

佢喺網絡走紅之後，本來嫌佢小說太血腥嘅出版社，都掉番轉頭搵孤泣出書。


孤泣同Emily講，唔好放棄自己夢想，成功要自己爭取，「我都試過畀30間出版社拒絕。編輯決定你本書可唔可以出版，但放上網就唔同，由大眾評價，更加公平同接近民意」。孤泣出版咗17本小說，其中4本出售咗影視版權。