內地生添馬上堂

【明報專訊】學聯過去5日發起大專生罷課，Emily留意到，連日嚟有唔少教師將罷課當係另類教材，仲帶埋學生去添馬公園上堂。好似香港城市大學創意媒體學院客席講師俞若玫，噚日就將原本喺城大課室上3個鐘嘅堂搬咗去金鐘，要求學生分組喺罷課現場至少訪問5個人，並或拍攝成一段約5分鐘嘅短片當做功課。


俞老師話，佢今學期教碩士課程「視覺民族誌」，即係用視覺藝術做人類學研究；由於班上29個學生有26個係內地生，所以希望同學親身接觸香港社運，等佢哋有機會了解吓香港人點諗。


咁內地同學又點睇今次罷課呢？來自廣東嘅潘同學就話，相信內地人對政府管治都有不滿，但就唔會好似香港咁成日遊行示威。佢仲話，從內地人眼光而言，其實中央拋出一人一票選特首方案已經算係好民主，但佢都明白罷課學生係爭取「無篩選」選舉。


司機二折收費載小學生採訪

香港基督教服務處觀塘樂teen會，噚日安排22名6至14歲細路到場擔任「小記者」，要小朋友同時採訪香港廣西新界社團總會國慶集會，同埋政總嘅學聯集會。社工李偉頌講咗個小故事畀Emily知，話說佢哋想由順利邨租車去政總，但唔夠錢，而司機知道佢哋去政總，一口答應用原價兩成價錢接載，來回只收400蚊！


喺學聯同學民罷課場地，都見到唔少熱心市民向學生送上心意。有市民送咗幾箱鮮橙、蘋果，有人派麵包，現場仲有大量樽裝水、紙包飲品，連Emily都受惠。