新創建踩埋醫療航空領域

【明報專訊】新創建（0659）星期二派完成績表後，管理層馬不停蹄，噚日見完投資者後，執行董事曾蔭培再約傳媒一聚。曾蔭培講，公司手頭現金有70億銀，加上出售澳門電廠生意分佔15億收益，今年可以撥40億銀準備用嚟喺大陸揾公路同水務項目收購。佢對公司近年新進入嘅醫療同航空領域嘅生意亦寄以厚望，話希望第日呢兩瓣可以成為新嘅核心業務。話唔定新創建變身，就靠新嘅生意食糊。


曾蔭培話，以前公司都試過去歐洲及其他市場揾新項目，但是碰到歐洲經濟轉差，最後都係回歸內地揾新嘢投資。最近香港興環保，喺政府資助下，佢地入咗三架混能巴士，不過就貴過普通一部歐四巴士成倍，都係試試睇吓效益再定點做。最近講緊佔領中環，佢話唔知人哋搞到幾大規模，唯有睇吓政府點安排，但係佢估應仲有其他路行，市民未至於喺佔中期間車輛打晒困籠無車搭。


email: piano@mingpao.com

[小琴密語]