中學生第二天罷課 班主任電父母支持

【明報專訊】Emily前日見到添馬公園有幾個中學生「提早罷課」，噚日再去添馬公園，仲見到聖若瑟英文中學中四級梁澤謙同學嘅影蹤，但未見聖芳濟書院兩名曾經話罷課嘅學生。Emily打畀兩個學生哥問吓，一個話天氣唔好無去，另一個話再諗過之後決定聽日先再罷課。

前日著校服去罷課嘅梁同學，噚日一早就去到添馬公園草地，用心聽唔同學者講課，佢仲話噚日朝早學校嘅班主任打電話畀佢爸爸媽咪，話支持佢嘅行動，又提佢保重身體，仲應承會幫佢補課"口添"。

梁同學話，之前有喺學校呼籲其他同學一齊罷課，前日亦有將自己喺添馬公園上公民課堂嘅情况喺facebook分享，「有個同級同學見到我嘅分享之後，決定星期五都會嚟罷課」。佢話個同學講，本身唔會當面同人哋講關於政治嘅嘢，但見佢有參與，所以都話想參與。

梁同學同Emily講，媽咪本來反對佢罷課，但之後同媽咪解釋嚟添馬公園做乜，又同佢講喺公園學到嘅嘢比喺學校學到嘅仲多，最後成功說服到媽咪。

視障畢業生到場撐學生

另外，Emily噚日喺添馬行咗個圈，都發現有其他中學生嚟聽書，其中有兩個讀緊現代書院日校嘅中五學生。容同學噚日第一日罷課，佢指學校冇唔畀學生罷課，只係要佢之後補番家長信。另外，心光學校畢業生劉先生話之前無參加過遊行集會，噚日都忍唔住要去支持吓學生，仲話特首梁振英應該站出來與學生對話。