林天福：望港可做「亞洲中環」

【明報專訊】貿發局總裁林天福 下個月就會轉去機管局做總裁，噚日佢就同成班傳媒朋友見面講吓離別感言。佢話自己今年56歲，響貿發局做咗28年，真係半世人響度過，接近30年見證香港經濟發展，佢就寄語大家要放眼國際，虛心接納國內外人才，令香港成為「亞洲中環」喎。


林天福自稱「香港大好友」，但佢話擔心周邊城市不斷進步，香港優勢不斷收窄，「經濟配套呢幾年真係慢咗」，好似會展呢兩年就因為空間不足，忍痛放棄咗好多展覽同會議，「我哋損失嘅唔係一兩個客或者咩酒店餐飲生意，而係以後人哋唔會再第一個就諗起香港」。


林天福話，香港人一定「要更有國際視野，有國際包容心去接納國內外人才來香港生活、工作，令香港成為亞洲區嘅中環！」

又咁講，外面有聲音質疑林天福冇航空業經驗點接掌機管局呢？佢就引用阿里巴巴主席馬雲投資恒大足球時所講，「外行人都可以領導內行人，關鍵是係外行人要尊重內行人」。


email: piano@mingpao.com

[小琴密語]