名人齊貼學生相撐罷課

【明報專訊】學聯噚日起一連5日發動大專生罷課，網上亦有人參與「一人一相撐學生」行動聲援，獲唔少名人支持，包括藝人何韻詩、明哥黃耀明、公民黨副主席陳淑莊，同埋學民思潮召集人黃之鋒，佢哋紛紛喺社交網站上載陳年學生相。


剛升上公開大學嘅黃之鋒上載facebook嘅學生相，個樣冇咩唔同。陳淑莊就貼咗張紮孖辮嘅學生相，話估唔到做咗「中女」，學生變咗佢最好嘅老師，教曉佢唔係要以「有無用」決定行唔行動，而係靠行動帶來希望。


明哥就借用上周六喺倫敦睇嘅一套音樂劇，提醒社會「莫欺少年窮」。何韻詩就上載喺加拿大讀書時嘅學生證，當年只得13、14歲，佢話「原來當年信念已現雛形」。


港生澳洲9院校派黃絲帶

有喺海外升學嘅港生都心繫香港。一批澳洲留學生噚日喺悉尼大學、澳洲國立大學、墨爾本大學等9所院校派發黃絲帶，聲援罷課行動，並發起聯署，指自己雖然人在海外，但心繫我城，身為土生土長香港人，唔能夠獨善其身，要求中央政府立即撤回政改框架嘅決議及取消小圈子篩選。


至於部分身在美國同加拿大嘅高中、大專及研究院學生，上周亦喺網上發起聯署，批評政改與民意對立，至今收到過百名留學生簽名支持。