出錢出力 吳宗權百萬泳奪亞

【明報專訊】一年一度嘅「公益金會德豐百萬泳」噚日喺淺水灣舉行，約有380名健兒參加，當中不乏富豪後代及紀律部隊成員。賽事由會德豐冠名贊助，年紀輕輕嘅公司主席吳宗權梗要落場，佢喺公開賽組別以10分28秒得到第二名，慢冠軍張凱傑3秒。上年賽事其中一個亮點係兩代接力賽，有九倉主席吳光正同阿仔吳宗權一齊落海，但吳光正噚日上京，今日要見國家領導人，所以無參賽。


參與「領袖邀請賽」嘅政經人士都有來頭，包括中港照相器材集團有限公司行政總裁孫道弘、華人置業集團主席及行政總裁劉鳴煒、行政會議成員陳智思等，原來唔少富豪第二代、第三代都係運動健將。今次游泳籌款為公益金籌到近500萬元。