流動「收銀車」回收毫子

【明報專訊】自從八達通、易辦事等嘅電子貨幣愈嚟愈流通，Emily都好少帶住「神沙」出街，因為有啲商舖會拒收一毫子、兩毫子。金管局啟動「硬幣收集計劃」，由10月6日開始喺全港18區擺放兩架重10噸嘅流動「收銀車」，免費幫市民將硬幣換成現鈔或者增值八達通，每次最多可以帶10公斤硬幣「上車」，面值不限；若果以1蚊硬幣重7克計，每次就可以換到差唔多1100元左右。


每7日換地點 限換10公斤硬幣

據金管局資料，現時喺香港流通嘅硬幣有66億，淨係一毫子、兩毫子都分別有1.7億同2.3億，但市民都少用咗細面額硬幣，加上去銀行兌換要收手續費，所以都幾唔方便。金管局總裁陳德霖話，今次計劃會試驗兩年，收集到嘅硬幣會回流返市面，又可以減少再鑄幣嘅需要。


「收銀車」由10月6日開始會率先喺牛頭角上邨面世，之後每7日會轉一次地點，包括黃大仙鳳德邨、馬鞍山利安邨、天水圍天晴邨、上環同灣仔等地，每日朝9晚7服務。「收銀車」地點可以參考金管局網頁（coincollection.hkma.gov.hk）。