專資會晚宴高官雲集

【明報專訊】「梁粉」雲集嘅香港專業資深及行政人員協會（專資會）噚日喺酒店舉行8周年晚宴，特首梁振英、律政司長袁國強同中聯辦副主任王志民都到賀，專資會仲特登喺到場簽名牌中間位置貼上膠片，預留搶眼位置畀3個貴賓簽名留念。


專資會喺開場之時仲曬冷，叫晒10幾個今年獲授勳嘅成員，包括房協主席鄔滿海、全國人大代表陳振彬等上台同梁振英合照，唔知仲以為佢哋預演授勳。晚安有表演項目，由會長盧偉國表演中樂，最後仲同一眾嘉賓歌唱慶賀，高歌一首《月亮代表我的心》，財經事務及庫務局長陳家強同埋近日被囡囡同學仔一家人告誹謗嘅發展局長陳茂波都仲有雅興，上台同眾人一齊高歌。