馬雲澄清唔會「移民」

【明報專訊】通常一隻新股上市，大家會聚焦喺佢嘅配售情况同定價，不過阿里巴巴真係唔同啲，除咗由舊年開始引起嘅股權架構爭議，呢兩日仲多咗一個輿論點，就係創辦人馬雲嘅身分。小琴家就被呢件事搞到精神分裂，事關呢頭明明話佢嚟緊會做「新香港人」，嗰頭佢又澄清話仲好熱愛做「杭州佬」。


話說大陸傳媒前日話馬雲自爆諗住退休定居香港，小琴都記得舊年見馬雲嗰陣，佢已經話出年會攞香港身分證。點知噚日朝早，阿里巴巴就喺官方微博澄清，話馬雲現居杭州，戶口所在地係杭州，亦係中國公民，家同未來都唔會有任何移民計劃。馬雲亦喺來往扎堆度話，佢喺杭州出世、返學同創業，做杭州佬幾好。


不過，馬雲查實由始至終無否認自己會攞香港身分證，只係話「所有移民香港的大陸人，確切的說應該是移居香港」。咁既然佢唔會「移民」香港，又會唔會「移居」香港呢，真係被小琴有好大幻想空間。


email: piano@mingpao.com

[小琴密語]