「罷課關我事！」 教授齊開講

【明報專訊】學聯下星期一（22日）起發動罷課一周爭取真普選，但就講明「罷課不罷學」，一班大專學者出嚟聲援支持，噚日仲啟動咗一個「我係老師，罷課關我事！」嘅專頁，決定於23至26日期間每日喺添馬公園開堂授課，現已有80幾個教授參與，將會由民生、社會、宗教同國際事務等唔同角度出發，闡述香港嘅政治、民主同抗命運動嘅課題，相信會非常熱鬧。


露天流動教室

發起人之一嶺大文化研究系副教授陳允中話，暫時預計有100幾個教授加入，每日會有3個「教室」，每個「教室」有7堂，每堂授課1個鐘，所以部分教授可能會係後備席，或者流動式喺唔同嘅大專院校做講座。不過佢笑住話，所謂「教室」都係露天，但會分隔去唔同位置，唔會有任何干擾，但就講明可能有100到3000個學生不等，叫班教授要有心理準備咁話。


今次義教嘅學者包括浸大杜耀明、港大何式凝、中大馬嶽同黃洪等等，聽日又會公布一個「公民授課」名單，預期有10幾個律師、規劃師等專業人士參與。陳允中補充，現時仲廣邀緊民間團體，希望佢哋出席講吓社會議題，希望可以趁政改討論呢個機會，加強公民社會嘅教育。