全馬網上報名 3小時爆滿

【明報專訊】Emily好多朋友近日對住部電腦，撳爛唔少「F5」掣，繼早前要上網爭購iPhone6後，有跑步發燒友喺噚日打風嘅清晨，希望上網報名參加渣打馬拉松嘅全馬比賽。要跑逾42公里的全馬組別噚朝7時起接受報名，1.5萬個名額喺約3小時後旋即爆滿。


跑友呻今屆報名較難

出年1月25日舉行嘅渣打馬打松，各項賽事共有7.3萬名額，其中1.5萬個全馬名額噚日可在網上實時系統報名，但至早上10點半便滿額。有跑友就喺網上大呻，呢屆報名較過去幾屆難，有人仲話去到8點幾已報唔到。Emily同浸會大學體育學系副教授雷雄德八吓，佢話大會早前畀過去全馬佳績嘅參賽者優先報名，令到報名氣氛更熱熾，但佢分享歷屆經驗，每年約有一成人臨場「甩底」，「報名費僅300元，加上報名後便可獲渣馬的上衣」。


至於半馬同10公里賽事，將分別於本周五及下周二早上7時起接受報名，有心人屆時又要對住電腦努力喇。