田家兄弟共膳靠汪阿姐撮合

【明報專訊】自由黨黨魁田北俊同新民黨副主席田北辰雖然係兩兄弟，但兩人同枱食飯機會唔多，阿姐汪明荃就喺佢主持嘅無綫節目《女皇的盛宴》「撮合」佢哋食飯，地點係田大少嘅山頂豪宅，除咗有得睇豪宅設計同埋無敵海景，當然唔少得講政治。節目喺明晚8點播出，Emily聽聞汪阿姐有問到田大少會唔會選特首，田大少就顧左右而言他，冇直接回應。


母語教學 兄弟意見分歧

節目中，田大少介紹自己興建嘅豪宅，由佢嘅仔女設計，用咗年幾時間至起好，市值租金每月可以去到50萬。田大少同田二少都有講自己點樣發迹同從政，仲聲稱兩人嘅政見分歧，係由於對母語教學政策有唔同睇法。


不過屋企係女性主導，兩人仲話雖然呢個家有好多工程師，但換燈膽家務都係要勞煩媽媽做。田二少又話，阿哥早從政，知名度高，有時自己出街，會畀街坊誤認係大少。