1粒欖核 高達斌甩5隻牙

【明報專訊】愛港之聲主席高達斌因為一粒欖核唔見咗5隻牙同十幾萬蚊。話說高達斌舊年外出食飯，唔覺意咬到粒欖核，搞到一隻牙鬆咗，拖咗成年無理，結果另外4隻牙都鬆埋，最終甩咗5隻牙。今次真係「禍從口入」，高達斌仲話使咗十幾萬補牙"口添"。
愛港之聲噚日開記者會講解未來一連串「我要普選特首」行動，平日講嘢都叫清楚嘅高達斌，突然講嘢「漏風」。Emily發現佢甩牙，心諗唔通「講大話甩大牙」？之後高達斌話係因為一粒欖核搞到甩咗5隻牙，下個月會去補牙，不過唔會補金牙。
雖然有啲漏風，但高達斌仍同記者分析局勢，話即使政改唔通過，對中央同香港政府反而有利，因為否決方案嘅泛民會失民意，令佢哋喺2016年立法會選舉失去議席。少咗反對派拉布拖後腳，政府就可以順利施政。咁點解佢哋又要搞汽車巡遊同大遊行，叫泛民議員聽民意通過政改方案呀？佢話因為大家都想一人一票選特首喎。
對於有傳言話佔中會喺10月1日舉行，平日落力反佔中嘅愛港之聲，就話嗰日唔會有搞作，話「費事同菲傭迫」。