跳海撐救生員 阿人瀟灑 長毛論盡

【明報專訊】噚日維港上演救生員跳海抗議人手不足同爭取合理待遇，工黨立法會議員李卓人同社民連梁國雄（長毛）落水游埋一份撐救生員罷工。李卓人體能唔錯，唔使水泡輔助都可以游足全程，而自言體能麻麻嘅長毛，落水游咗幾步就要綁番水泡，仲要連住由艇仔拖行嘅帆布標語，換言之成程畀人拖住游多過自己游囉。


只見李卓人姿態利落地插水，長毛就幾乎成個人撻落水咁滯，游多兩步救生員即刻幫佢綁番水泡，之後全程被艇仔拖住游，所以佢都話冇乜點游過，唔辛苦，又話救生員好照顧佢，完全感受到救生員嘅專業。


李卓人游完後話唔辛苦，「爽過陸上遊行」，起碼浸喺水係涼嘅咁話，只係有啲電油味啫。佢大讚香港救生員專業，工作有生命危險，今次同工會一齊「下海」，希望透過行動畀市民知道救生員嘅重要，亦望署方盡快解決救生員人手不足問題。