觀塘遊樂場億元「大變身」

【明報專訊】傳統工業區觀塘逐步轉型為商貿區，當中位於區內中心嘅駿業街遊樂場面臨大變身。發展局舊年起分兩期翻新呢個遊樂場，首階段耗資1200萬元，先改造公園範圍。負責設計嘅資深建築師許焯權同Emily話，公園佔地1300平方米，為咗突顯觀塘曾經係本港工業重鎮嘅歷史，公園加設咗4個貨櫃，每個貨櫃分別介紹觀塘唔同時期嘅發展情况，同埋播放工業家訪問片段，每個貨櫃都可以隨時開關，加強公園嘅特色。


球場變草坪 市肺可踩可瞓

第二階段就計劃大改造毗連公園嘅硬地球場，面積達7000平方米。助理康文署長吳志華話，政府計劃耗資1億元，將球場改造為中央草坪，並會擺放藝術品，成為區內市肺，「變身做草地後，未來市民可以踩、可以瞓、可以喺度休憩食吓嘢，甚至喺畀老闆鬧完落嚟消消氣」，未來仲會研究舉辦音樂會等文化活動，希望創造區內全新嘅公共空間。


當局計劃今年底向立法會申請撥款，計劃明年內動工，預料2017年完工，屆時市民可以喺觀塘區中心享用草地。


至於原本嘅球場則會遷移至康寧道公園一帶；而遊樂場隔籬嘅駿業街熟食市場，當局亦會保留及翻新提供空調抽風設備，令區內仲有廉價美食。