唐唐意大利賀62歲生日

【明報專訊】社會呢排日日都討論政改，但全國政協常委唐英年無官一身輕，成日周遊列國，最近佢就身處意大利嘅那不勒斯（Naples）度過62歲生日，認真梳乎。講到生日願望，唐唐比較宏觀，都係講番政改問題，話希望港人團結一心，落實2017年普選，呼籲「與其原地踏步，不如行前一步」。


唐唐喺微博話今次慶祝生日簡單而愉快，去到意大利，當然係食pizza慶祝，佢今次同屋企人去意大利南部，都去咗唔少地方，好似阿瑪菲海岸（Amalfi Coast）、卡布里島（Capri）同伊斯基亞（Ischia）等。


佢形容當地生活簡樸，又同屋企人行市集，大讚食物新鮮、價錢相宜。相信平日好少入廚嘅唐唐，去旅行時亦會同屋企人煮飯，享受天倫之樂。