作家陳慧﹕無見過咁嘅香港

【明報專訊】作家陳慧一向低調，年多前走出來當先鋒，是佔中十子名單的驚喜人物。她筆下的《拾香紀》寫了1970至90年代的我城，那天分享的一句「我唔見咗我個香港」，引起無盡共鳴。五旬婦人今天再嘆一句，「我咁大個女，我無見過咁嘅香港」。佔中十子，另一說法是死士，陳慧說：「若然能夠得到我想得到的，我巴不得死。」


壓力與日俱增 「唔係因為佔中」

問壓力，陳慧拒絕答，看着遠方，停頓十數秒。「有乜嘢無壓力？幾時我要無壓力的生活呢？在香港，我一日比一日有壓力。壓力唔係因為我去佔中。」陳慧住灣仔，幾年前大街小巷沒有拖篋，她會主動為旅客指點迷津；今天人家問路，她特意說廣東話。自由行入侵，騷擾了她的生活。還有新界東北一役，聯署、一人一信、集會，她統統做了。「有乜嘢忟得過，你同條仔講嘢，佢都唔睬你。」她反問：「呢啲唔係壓力咩？」


自立法會財會主席吳亮星宣布通過東北撥款一刻，陳慧的facebook頭像撤走沿用多年的相片，換成一片黑。朋友說，「黑？有排都未去到最黑」。 她回應說，這是一場沒有硝煙的戰爭，黑是提示，「喂，ready喇」。


戰幔其實早已揭開，她的電郵遭入侵，先是亂發借錢郵件，換了一個新帳戶，卻有不知名者登入，應該收到的郵件會比同事遲一日才收到。雖是預料之內，她仍憤怒，但稍稍平息，「唔會火滾得我呢兩年睇嘅新聞」。


陳慧說：「你可以話我『膠』，但我係愛與和平。」只要氣溫多降幾度，清風明月，與朋友聚餐，便是她的人間好時節。「唔好搞咁多嘢啦，我都係咁諗。」但中央落閘，溫和派也灰心，有自認心水清的香港人跑出來說：「你咁天真，你咁傻，從來都係一國一制。」陳慧嚴聲厲色﹕「搞清楚，唔係我唔醒，係佢哋呃緊我。」但她直覺政改方案必然在立法會通過，不是悲觀，是現實。「高鐵點過呀？新界東北點過呀？過唔到係聖誕禮物。」那佔中有何用？陳慧心知，「你班友仔去中環坐一坐就得，唔好咁天真啦。」她堅持，只為告訴下一代，「世界唔應該係咁」。


冀告訴下一代「世界唔應該係咁」

掛上十子名牌，陳慧說自己如常過活，但又說「有無嘢改變咗？好多嘢改變咗」。 例如呢？她抿嘴，十幾秒又過去，「完咗佔中我話你聽」。問了又問，終於說出口，近兩年的日子，她失去安全感，徒添了憂慮。「好攰，你覺唔覺得呀？」 健康日差，她戒掉點燃了30多年的香煙。獨處時，她還會流淚。「我為呢個城市喊。」哭得多嗎？「你話呢？」