周融腳痛做手術周一公布新搞作

【明報專訊】唔知喺咪為反佔中站台企得太耐，「保普選反佔中大聯盟」召集人周融噚日因為「腳痛」要去做手術，但無影響佢反佔中嘅意志。周融好風騷咁話，因為有150萬人簽名反佔中，令「佔中大勢已去！」不過，大聯盟唔會就咁收工，佢透露下禮拜一大聯盟會開記者會，公布新一輪活動。周融強調，新搞作無意同佔中對決喎。


Emily聽聞佔中三子會喺9月9號、即中秋節翌日假期剃頭明志，唔知周融有無興趣仿效？除咗佔中三子，各泛民政黨都派最少一個代表一齊剃，但家未有名單。


至於民陣「入住先」申請遊行，佔中發起人陳健民喺facebook同大家澄清，佔中聽日唔會遊行，而民陣亦會取消申請。民陣召集人楊政賢強調絕對唔係玩警察，只係「突然之間唔想搞」。