九巴美女海報頻失蹤

【明報專訊】家朝早繁忙時段要舒舒服服搭車真係好難，特別係乘搭東鐵返工，閒閒地要等兩三班先逼到上車，九巴上個月底就特地推出兩條長途晨早特快線，包括由上水去尖東嘅T270，同埋上水去藍田嘅T277，以紓緩東鐵擠塞情况咁話；為咗介紹新路線，九巴隆重其事，除咗拍攝短片廣告之外，仲聘請女model拍攝海報（圖）。


海報宣傳晨早特快線

海報主題叫做「夢寐旅程」，模特兒喺九巴座位上，擺出微笑甜睡嘅姿勢，似係想寓意返工搭巴士好過搭鐵路咁。九巴喺兩條線沿線巴士站貼上呢款海報，但九巴企業事務總監陳碧君（Vivian）噚日同Emily一眾傳媒行家茶敘時話，海報推出一個多星期後，九巴喺上水、粉嶺同尖沙嘴巴士站頭，成日都唔見咗張海報，懷疑多次被人偷走，仲講笑話可能個模特兒太吸引喇，令唔少人想私下收藏。九巴仲因為咁特登印多咗海報，但就無透露到失竊海報數量。