北極冰屋驚現企鵝

【明報專訊】下周一係中秋節，康文署今年繼續喺多個地區舉辦中秋綵燈會，其中尖沙嘴文化中心嘅「世界民族風情畫」綵燈展上個禮拜四已開幕，展示唔同民族特色嘅綵燈，但有眼利網民發現，其中以愛斯基摩人冰屋生活做主題嘅一個綵燈區，出現咗幾隻企鵝！愛斯基摩人生活喺北極，而企鵝只有南極先有，平日應該唔會「碰面」㗎喎。


康文署﹕打破民族地域界限

Emily問過康文署，發言人解釋今次綵燈展以多個民族同港人一齊慶祝中秋為創作意念，係「以天馬行空想像，打破民族嘅地域界限，一同相聚香港」，希望可以增添賞燈趣味，仲話呢個係設計師原有創作概念，唔會修改。


講開又講，其實唔少人唔知企鵝住邊，經典例子之一係民建聯副主席張國鈞，佢曾經喺一個電視節目講過「一直以來，北極都係一個非常寧靜、人少企鵝多嘅地方」，令佢自此多咗個「企鵝男」稱號。