王振民：英文版翻譯有錯

【明報專訊】清華大學法律學院院長王振民噚日中午去咗外國記者會午餐會，講白皮書同政改問題，前基本法草委、民主黨創黨主席李柱銘，民主黨李永達及南區區議員司馬文等都係座上客。王振民話港人對白皮書反應超出佢想像，但強調白皮書無新嘢，一國兩制無改變，不過佢承認英文版嘅白皮書有翻譯錯誤，好似將治港者譯成administrators，其實應為people who govern Hong Kong。


王振民解釋，翻譯白皮書嘅係語言專家，唔係法律專家，譯得唔夠精準，佢建議大家應先睇白皮書中文版，因為中文就唔會寫錯。午餐會設答問環節，其中李柱銘就發問，質疑白皮書內容提到法官要效忠國家、照顧主權利益等，並唔合理。


王振民就話，回歸前香港司法部都要考慮英國，回歸後司法部門亦都應該要考慮國家安全利益。雖然佢嘅回應，李柱銘唔會同意，但佢會後都話，欣賞王振民有勇氣嚟同大家講白皮書。