西貢碼頭現「篋陣」

【明報專訊】有網民日前喺「西貢日報」facebook專頁上載咗一張行李篋層層疊相片，表示「今天（本周二）不是假日，但早上9時已經有幾百個自由行人士唔知响碼頭度做乜，到下午經過還發現公眾地方當酒店擺放旅行箱，咁同周街大小便有咩分別……」仔細數一數，呢個「篋陣」有8行闊、4層高，至少有32個行李箱。


有網友留言：「Call食環署話有人亂掉垃圾，清咗佢啦！」甚至有人要求以「阻街」為名報警。


西貢區議員方國珊得悉情况後即高呼：「離晒譜！我從未見過呢啲奇景。」佢問一問西貢船家朋友。據了解，原來星期二有間內地保險公司包團到西貢一日遊，呢個團已經連續3年舉辦，今次有成1700人參加，出動近60艘船接待。


疑內地團友未攜篋上船

方議員估計，可能有個別團友攜篋同行，希望「購買日用品」，但最終未有拖篋上船，選擇「就地解決」，佢話會呼籲食環署同相關部門多加巡查處理。