華仁校慶籌款行小班 校友齊撐

【明報專訊】傳統名校香港華仁書院同九龍華仁書院今年分別95同90周年校慶，今年校慶校方會舉行4項活動慶祝，並想籌6000萬元畀兩間華仁繼續行小班教學。名人校友眾多嘅華仁，邀請咗好多校友做活動嘉賓，例如請到港華校友、運輸及房屋局長張炳良10月26日主持校慶步行開步禮，另一名港華校友、藝人李克勤，就會喺下年8月1日嘅紅館校慶匯演演出，身為紅館常客嘅克勤一定駕輕就熟啦！


兩間華仁行咗小班教學已經6年，九龍華仁書院校長鍾衞良就話，第一屆接受小班教學嘅學生今年文憑試成績唔錯，總體成績好過舊年，有75％學生成績達到大學最低入學資格，但係得75.7％嘅學生中文拎到第3級或以上。鍾衞良話為咗改善中文成績，學校編印咗一本《中國寓言選輯》，會喺新學年派畀全校學生，希望佢哋睇多啲書。