新社聯贊助亞視《香港亂殤》

【明報專訊】播昔日動亂 「望以史為鑑」

亞洲電視噚晚播出新節目《香港亂殤》，數番香港過去幾十年發生過嘅社會混亂事件，開宗明義話香港出現「社會動盪迹象」，望以史為鑑；亞視仲搵咗「新界社團聯會」同「文化資源開發」贊助節目，又搵埋新社聯理事長、「保普選反佔中」大遊行籌委會發言人陳勇做主持。陳勇同Emily講，佢只係應邀出任節目客席主持「讀稿」，至於新社聯贊助咗幾多，佢就話唔係咁方便講，叫Emily問番亞視。


噚晚個節目不斷播出歷史畫面及親歷者嘅回憶，由1956年九龍「雙十」暴動，講到1970年代警察貪腐、80年代嘅移民潮等等；當中又訪問咗反佔中組織「幫港出聲」成員雷鼎鳴，佢質疑一旦佔中發生，中央對香港嘅睇法或會有變。亞視網站節目介紹《香港亂殤》話，圍繞政改方案，社會近日分裂加劇，警民衝突增多，出現「社會動盪迹象」，認為回顧歷史上「香港社會動盪事件」，以史為鑑，「無疑有利於香港社會的長治久安」。


杜耀明話撐佔中者都可贊助

浸會大學傳理系助理教授杜耀明話，《香港亂殤》回顧歷史上香港社會動盪事件，或可以視之為「資訊節目」，但當中都涉及政治宣傳。至於有無違法，唔同節目有唔同要求，要交由通訊事務管理局裁決。不過，杜耀明補充，亞視家推出一個咁嘅贊助節目，他日佔中支持者同樣贊助一個以類似形式製作嘅節目，亞視係唔可以推卻㗎。