劍擊奪獎 財爺讚包拗頸學弟

【明報專訊】喺南京青年奧運會中，港隊喺幾個項目都爭到獎牌，其中劍擊代表蔡俊彥（Ryan）就拎到一面男子個人花劍銀牌、一面洲際混合賽金牌，為港爭光，財政司長曾俊華噚日嘅網誌就提起佢，皆因Ryan係佢喇沙書院嘅學弟，而財爺至今仍有喺喇沙教劍。


財爺話，Ryan中三起到體院特訓，比較少參與喇沙隊嘅練習，佢話自己雖然無機會同Ryan個別授課，但早喺Ryan中一時已經對佢有特別印象，因為Ryan頗有天分，加上係左撇子，有先天優勢，亦有超強鬥心。佢話對方中一時已經唔怕挑戰師兄，打起上嚟亦旗鼓相當。


財爺又話，Ryan有啲似網球場上嘅「壞孩子」麥根萊——「唔輸得」、「包拗頸」，屬於帶啲野性嘅急性子，好難要佢專注練習基本功和步法，但去到比賽，呢種性格就成為優勢，即使落後，都有力後來居上，佢自己就親眼見證過Ryan打出幾次漂亮嘅逆境反勝喇。