登高行到尾 三子得一人

【明報專訊】沉靜咗一陣子嘅「佔領中環」終於有新搞作，佔中噚日喺超過30℃高溫下舉行「民主登高日」，由香港公園行去山頂公園，全程大約兩個半鐘。行山途經政務司長林鄭月娥位於白加道嘅官邸，佔中三子之一陳健民喺起步前，就好搞鬼咁「提醒」大家，一定要守紀律，話佔中未正式舉行，大家經過官邸時千祈唔好去佔領。


垃圾蕉皮「袋住先」

三子中，噚日登高只有陳健民行晒全程，戴耀廷（Benny）因為脊椎勞損令到腰痛惡化，行唔到山；朱耀明就因為要喺終點打點，無參與行山。近600個支持者就喺陳健民帶隊下上山會合另外兩子。


佢哋喺林鄭官邸附近一片陰涼地方設置休息站，為參加者提供水同香蕉，等大家補充吓體力；義工協助收集水樽回收，但就叫參加者將垃圾同蕉皮「袋住先」。同反佔中8．17遊行唔同，呢次登高唔單止無咩垃圾遺下，主辦單位好有手尾，佢哋係山頂公園終點站玩打手印活動，散場時義工都有清洗番地上嘅顏料。


登高期間，Emily就發現有一部警車「咁啱」泊喺「政務司司長公館」嘅牌前面，遮住個牌。不過就算有部車泊喺度遮咗官邸標示，大家都知行過嘅係乜嘢地方啩！