樹根被窒「中英都唔得」

【明報專訊】48名立法會議員噚日下午齊齊上深圳出席政改座談會，同全國人大常委會副秘書長兼基本法委員會主任李飛等京官傾政改。公專聯梁繼昌北上開會，不忘翻牆更新facebook，仲偷影民建聯鍾樹根發言時嘅相，話樹根以廣東話提問，搞到李飛聽到耳都側埋，仲取笑樹根「英又唔得，中又唔得，究竟你咩嘢得？」


樹根就反駁話自己喺「本土人」，當然要用廣東話發言， 「鬧泛民時都可以等佢哋聽得清楚喲」。佢仲大大聲叫Emily幫佢轉述「梁繼昌你好無聊」。


樹根：梁繼昌你好無聊

另外，工聯會陳婉嫻成為政改座談會上嘅「幸運兒」， 獲得兩次發言機會。嫻姐笑住話自己擺烏龍，所以最終都只係問咗一次問題。佢話入場時以為要簽到，所以喺張紙上寫咗自己個名， 埋位時又好似忘記入紙提問， 所以寫多次，搞到抽中佢兩次。


嫻姐話，成個座談會好好玩，又話唔介意大家將焦點放喺泛民身上，表明下次再有類似活動都會參加。


新民黨葉劉淑儀就話，雖然焦點放在泛民身上，但佢完全唔認為自己成為配角， 仲話每次出席呢種座談會都有好多得着，下次都願意再參加。