淘寶買嘢 7仔取貨

【明報專訊】阿里巴巴雖然忙緊上市，但近排仍四出同各國政府郵政部合作，搞咗咁耐終於到香港喇。噚日，淘寶香港就宣布，郵政局、7-11、順豐、中通快遞同遞四方速遞合作，搞個叫做「自取點」嘅攞貨服務。呢個服務概念唔算新嘢，好多速遞公司都畀客戶自己攞貨，可以慳啲運費咁話。


之不過，由財雄勢大嘅阿里正式搞喇喎，斷估個影響力都唔細。淘寶香港地區業務主管呂紹勇（圖）就話，遲啲可能會搵多啲合作伙伴，畀啲客喺多啲地方攞貨。家就有多過200個地方，包括全港125間郵局、部分7-11同埋前面提及嗰幾間速遞公司嘅門市。


[小琴密語]