海洋公園招逾15傷健學員

【明報專訊】近年社會宣揚傷健共融文化，但殘疾人士求職仍艱難，有弱聽、弱視者寄咗過千封求職信都搵唔到工，最終喺海洋公園至搵到工。海洋公園家就聘用咗50名殘疾員工，公園今年連續第二年推出培訓計劃，招收殘疾學員培訓，表現好嘅，就可以留低做長工。


弱聽漢表現佳正式入職

呢個計劃舊年招聘咗12名學員，患弱聽同弱視嘅陳熠輝係其中一人，佢話殘疾令求職時遇到好大障礙，自3年前喺專業教育學院畢業之後，只曾喺盲人輔導會做過半年實習，寄出超過1000封求職信，但只得約30個面試機會，全部都失敗而回。阿輝家獲海洋公園聘請做正式員工，任職票務部，協助遊客入場同入數據資料。


海洋公園噚日起至本月29號招聘超過15名殘疾學員，入選者將會去遊客服務部、餐飲部、纜車部等15個部門，接受9個月培訓同有薪實習，表現良好就可以獲聘做長期及合約員工。