唐英年新馬叫No Regrets

【明報專訊】馬會噚日公布一批新馬嘅名字，其中出名愛馬、選過特首嘅政協常委唐英年（唐唐）事隔多年再度活躍於馬圈，仲將愛駒命名為「回眸一笑」，英文就叫「No Regrets」（無遺憾）。相信好多人同Emily一樣，會諗唐唐究竟係講緊對乜嘢無遺憾呢？唐唐就透過發言人解釋，話自己從來做事都係全力以赴、做到最好，所以唔會有遺憾咁話。


唐唐最近一次養馬已經係3年前嘅事，當時佢同目前官司纏身嘅前政務司長許仕仁，聯名養咗隻馬叫「知己知彼」，而佢以個人名義養馬已經要數番去2009年。今次唐唐隻新馬係一匹3歲新西蘭馬，去年以約169萬元轉售來港，已投入操練，未來有望盡快上陣參賽。