肌健協會收捐款 數天超去年總和

【明報專訊】一眾政圈、演藝界名人接力冰桶挑戰，同樣幫助ALS（肌萎縮性脊髓側索硬化症）病人嘅香港肌健協會，會長劉偉明同Emily講，過去幾日單計透過Paypal收到嘅捐款轉帳次數，已經多過過去一年嘅總和，但協會家只得3名正式員工，相信要下個禮拜先可計算到初步捐款金額，佢亦都希望公眾繼續多啲關注「漸凍人」。


7-Eleven每賣一袋冰捐5元

肌健協會噚日仲喺facebook多謝支持者，又提醒接受挑戰者要注意環境同安全。


另外，冰桶挑戰亦令冰粒銷量升，7-Eleven（7仔）都受惠，發言人話過去幾日冰塊銷量上升，為咗幫助ALS病人，家每賣出一袋冰塊，7仔會捐出5蚊畀香港肌健協會。


除咗7仔，畀立法會議員陳家洛點名嘅特首梁振英，噚日都透過新聞秘書話會捐1萬蚊畀香港肌健協會，另會捐100美金畀美國ALS協會。