「河」都識「飛」？反佔中大聯盟：海報無寫錯

【明報專訊】保普聯反佔中大聯盟聽日搞遊行，佢哋不缺錢，噚日就喺多份報章刊登全版廣告，廣告用咗維園同埋中環嘅相片，中間位置寫住「水靜河飛」四個大字。Emily睇落覺得好似有少少唔對路，唔明「河」點樣「飛」，於是向大聯盟公關程介南求教，程同Emily上「中文課」，話「水靜河飛」梗係無寫錯字啦，因為係「約定俗成」，大家睇得明就得，仲話如果學生作文，如將正確寫法「水盡鵝飛」寫成「水靜河飛」，老師都唔會話學生錯喎。


程介南：約定俗成 老師唔會話錯

Emily去查下《辭源》，「水盡鵝飛」係比喻「恩情斷絕，一拍兩散」。《元曲選》關漢卿嘅望江亭二係咁寫﹕「你休等的我恩斷意絕，眉南面北，恁時節水盡鵝飛。」


中文老師：會教學生寫正字

學生作文寫「水靜河飛」會點？任教中文科多年的陳匡正老師就話，佢會指正學生寫番正字，話字面解，「河」係「飛」唔起嘅。佢話做文字宣傳，用字嚴謹啲會比較好，雖然一般人睇得明，但唔應該得過且過。