趙心樹露面 拋政改方案

【明報專訊】久未露面嘅浸會大學傳理學院前院長趙心樹，噚日現身一個論壇，拋出政改方案。唔知大家記唔記得，2012年，趙教授被指提前發布有利特首候選人唐英年民調結果，結果最後佢要辭職。趙教授噚日一開口都拎自己開玩笑，仲話家都變成「驚弓之鳥」，但為咗政改，佢唔理得咁多，要提出一個「離經叛道」嘅建議。


倡「計分制」選特首

趙教授既然對候選人民調「深入涉獵」，Emily當然有興趣聽吓佢有咩高見。佢話，一直以來大家諗特首選舉，都係諗住用佢所指嘅「勾選制」，即係一人揀一個候選人，但佢質疑若用呢個方法，特首就只係受某一部分人控制，必然代表某一方，而敗方就會恐懼。佢建議特首選舉用「計分制」，又或者每個選民可以揀多個候選人，甚至為候選人排序，認為呢個做法可以令特首候選人向中間靠。


噚日論壇由「香江文化交流基金會」主辦，基本法委員會副主任梁愛詩都有出席，Emily睇番場刊，見到喺趙教授個介紹度，都有重提佢因民調事件辭職，主辦方都算「均真」。