迪士尼搞夜巡遊

【明報專訊】香港迪士尼樂園開園以來都谷白天客，啲客等埋放煙花就走人。10月起樂園推出夜晚新搞作，想話吸引多啲怕日頭曬嘅客人入嚟食飯睇煙花，直落睇埋第一次引入嘅夜間巡遊。


一支筆遙控演員服「色」

迪士尼樂園度假區娛樂事務及服裝總監利百為話，成個夜間巡遊籌備咗兩年，有7組全新花車，啲花車仲係首次創作嘅LED燈花車，總共用咗超過74萬粒LED燈。觀眾仲可以同花車表演人員互動，揸住支「米奇光影筆」，撳個掣，觀眾就可以遙控部分表演人員身上嘅顏色轉色，變紅、變綠、變藍、變白都得。不過，要玩互動，係要畀錢買嗰支「米奇光影筆」。


迪士尼市務總監黎珮珊同Emily講，近年客人都鍾意互動，而港人又鍾意夜間活動，所以搞個光影匯夜間巡遊，吸引多啲人買年票，而唔少人鍾意得閒入嚟食個飯、睇煙花，家就多咗個夜間巡遊可以留耐啲。夜間巡遊會喺10月，同萬聖節活動「迪士尼黑色世界」一齊登場，之後就全年無休，「迪士尼黑色世界」舉行期間仲特設340元嘅夜間門票