港男守護 13極瀕危鳥誕生

【明報專訊】全球剩低唔夠50隻、已被列為「極度瀕危」嘅中華鳳頭燕鷗，喺多個組織合作保育下，最近喺內地成功繁殖咗13隻幼鳥！今次嘅繁殖計劃，因要喺浙江一個孤島上面進行，香港國際鳥盟亞洲部主任研究員陳承彥留守咗喺無人小島3個月，當守護大使，希望確保燕鷗繁殖時不受威脅，同近距離監測同記錄。即使中途有兩次颱風佢都堅持留守，最終吸引咗43隻燕鷗去到島上。


飽歷兩次颱風仍堅守

香港觀鳥會、國際鳥盟同香港海洋公園保育基金噚日聯合公布喜訊，仲介紹咗培育幼鳥嘅方法，保育團體趁住5月中至8月中燕鷗繁殖季節，去到浙江韭山一個孤島鐵墩島，透過「群居吸引法」，好似放置鳥模型同播放假鳥叫聲，引燕鷗繁殖，最終吸引咗43隻燕鷗逗留，最後20對有繁殖。


中華鳳頭燕鷗「種群恢復」計劃舊年已經喺面積只有兩公頃嘅鐵墩島展開，呢個島隸屬象山縣韭山國家級海洋保護區，之所以選擇呢度，係因為舊年有一隻幼鳥喺度出巢，但因為無近距離監測，有關繁殖嘅資料非常少。今年研究員陳承彥就選擇留守收集數據，期望未來在周邊建立一個繁殖網絡。


中華鳳頭燕鷗又名「神話之鳥」，生活於浙江省一帶。上世紀80年代被認為已經絕種，於2000年再現馬祖列島。