佔中低調辦活動深化理念

【明報專訊】由建制派發動嘅「反佔中」運動呢排氣勢如虹，表示已收集到120萬個簽名聯署支持，泛民除咗食花生靜觀聯署人數，好似無咩行動回應，搞到唔少支持者都有啲失望。不過，對手高調行動，原來佔中卻相反，佢哋話會低調啲密密深化理念，嚟緊將計劃巡迴不同組織深化佔中理念同分享形勢，本月24日（星期日）更會舉行「民主登高」，歡迎所有支持者行高一啲、望遠一啲，吸番啖清新空氣。


辦「民主登高」 巡迴婦女社工界

佔中發起人之一戴耀廷今晚7點將會喺九龍佑寧堂出席「當佔中發生…」公開交流會，分享最新發展，同場仲會有於佔領遮打道被捕嘅大學生談個人體會，而佔中三子未來會巡迴去婦女界、社工界同醫療隊等深化理念，因為佢哋明白公民抗命理念難理解，所以不如趁家呢段時間去面對面解釋一下。


至於8月24日舉行嘅小規模「民主登高日」，就喺下午1點於香港公園奧林匹克廣場集合，一齊行去山頂花園，全程6公里，步行約2.5小時。有興趣參加者可以去和平佔中facebook報名。


黃玉郎簽名反佔中

建制派就繼續搞反佔中簽名，而「『保普選 反佔中』簽左名揮手區！」就喺facebook上載咗漫畫家黃玉郎嘅簽名相。有支持者留言讚賞「王小虎」為正義發聲，但也有留言質疑五毛黨出現。