陳葒校長：我無劇情咁慘

【明報專訊】早排引發爭議嘅無綫實况劇《我們的天空》，前晚播嗰集「非常校長」係以前中學校長陳葒放棄高薪厚職、開辦「陳校長免費補習天地」幫助清貧學生嘅真實故事為藍本。戲劇難免有啲虛構成分，劇情講到補習社面對業主加租，校長想賣樓補貼，搞到老婆鬧離婚，阿女又唔鍾意佢「降呢」做保安搵外快。陳葒話同屋企人睇完一笑置之，但為免大家誤會佢屋企人，佢話需要澄清，現實版嘅佢係冇咁淒涼㗎。


無為搞免費補習賣樓

陳校長話不但冇畀業主加租逼遷，之前仲有好心業主廉價租辦事處畀佢做補習社，家仲有善長贊助租金，但就冇劇中所講有人一次過捐500萬打救補習社，現實中佢間中心主要靠市民捐款集腋成裘，所以成日都等善款打救，近排佢哋仲建立咗個電子學習平台，希望市民可以捐平板電腦畀學生。陳校長又話，冇諗過賣樓補貼補習社，因為佢無樓可賣，因此老婆既冇為此鬧離婚，仔女亦唔會以佢做保安為羞。


不過部分劇情都幾到肉，好似主角馬校長喺快餐店幫學生補習，被食客鬧佢阻住晒，陳葒話，現實中搵唔到更適合嘅地方畀義工義教，所以佢哋真係喺連鎖快餐店或其他公眾地方幫學生補習，咁樣做義工其實唔容易，希望大家體諒吓。