黃之鋒拍拖見埋家長

【明報專訊】學民思潮召集人黃之鋒嘅一舉一動備受注目，早前佢交代文憑試成績就有數十名記者追訪。之鋒噚日上商台節目《在晴朗的一天出發》講近况，話最近參加中學謝師宴，差啲唔認得化厚妝嘅女同學，覺得佢哋裝扮太誇張，主持人隨即問佢係咪「心中另有佳人」？大個仔嘅之鋒大方承認，仲主動提及早前喺instagram放咗張同女朋友影嘅手拖手背影合照。


講開拍拖，之鋒話學民思潮無規定「中學生不應談戀愛」，不過自己一年收兩三次家長來電關心子女戀愛狀况，好似做咗成員嘅班主任咁，至於佢自己拍拖有無「通報」阿媽呢？之鋒就話自己開誠布公，雙方見過家長，印象良好咁話。


之鋒同幾個學民核心成員好快就唔再係中學生，佢強調學民無限制任何學生參加，而且一向都有大專生成員，所以畢業後唔會退出學民，上到大專後亦唔會即刻參加學生會、上莊喎。