八達通新CEO 愛開BLOG不愛開會

【明報專訊】香港高官家興埋首寫BLOG多過見記者或者落區了解民情，原來上任冇耐嘅八達通行政總裁高敏德（Kevin Goldmintz），都有呢個嗜好，希望利用BLOG同員工多啲溝通，歡迎同事回應，仲要各部門阿頭都要寫埋一份。據佢講話，員工回應都算踴躍。可惜佢個BLOG係喺公司內聯網度發布，外人無法睇到。佢仲講笑話，佢個人最憎開會，如果開BLOG可促進溝通、減少一啲無謂嘅會議，咁就真係very good喇。


高敏德今年3月先履新，佢之前係萬事達香港及澳門區總經理，所以對香港相當熟，話覺得香港近年空氣質素有改善，又賣口乖，大讚香港係亞洲最好住嘅城市。不過來自澳洲、身居要職嘅高敏德，都呻香港啲樓貴到買唔起，尤其家作為外籍人士，喺香港基本上都唔使諗買樓。同香港人咁同聲同氣，我諗高敏德同員工打成一片絕對冇問題呀。


[小琴密語]