反駁藍爺 戴耀廷罕有發火

【明報專訊】佔中三子之一戴耀廷（Benny）嘅形象一直都官仔骨骨，平日面對愛字派嘅狙擊同粗口辱罵都從容不迫保持笑容；不過佢噚日出席港台《城市論壇》時，就被前民政事務局長、國際專業管理學會會長藍鴻震（藍爺）激到「維園阿伯」上身，激動到瞪大雙眼兼手指指，高聲怒斥藍爺講嘢唔依事實。


強調從未鼓吹未成年參加

話說論壇中藍爺不斷批評Benny鼓吹年輕人參與佔中違法活動，Benny雖然已不斷澄清，強調佔中從未鼓吹未成年者參加，一直都係呼籲40歲以上市民參加，唔想藍爺老屈，但藍爺仍窮追猛打，Benny最終忍無可忍，成個人差啲跳起，佢一邊「郁身郁勢」，一邊怒斥藍爺「你喺公共空間講嘢，就有責任搞清個事實先去發言」。唔知Benny係咪自覺激動咗啲，反駁後面露微笑收火，回復平時溫文學者本色。


藍鴻震：如講錯或認錯

藍爺喺節目上話，佔中鼓吹年輕人參與係好多市民心目中嘅觀感喎，仲話香港有言論自由，只係「誠懇地講出我感覺嘅嘢」，「如果講錯，唔排除認錯」。


市民不滿列黑名單 罵謝志峰

另外，有幾個市民因為不滿被主持人謝志峰列入黑名單唔准入場，拎住大聲公喺場外示威並辱罵謝志峰。謝志峰喺中場休息時就話遲啲大家「去飲杯茶、食個包」，一齊傾清楚啲規矩，9月或者可以再畀佢哋進場。