反佔中暑期工請夠人

【明報專訊】保普選反佔中大聯盟今日開始正式收集簽名，之前透過珠海學院請兼職暑期工，成萬蚊一個月，Emily梗係唔放過，噚日打電話去問仲請唔請人，點知大聯盟召集人兼珠海學院客席教授鄭赤琰話已經請晒，同埋呢份工原則上只接受珠海學生申請。


講多一陣，Emily至知呢份工好福利，仲提供訓練，有義工教暑期工，喺街站遇到衝擊時，點樣「打不還手，罵不還口」。


守街站籲填表反佔中

暑期工主要企喺街站，有人經過時，叫人填反佔中表格，提醒有咩資料要填；由今日開始做到8月17號，朝九晚五，有一個鐘頭食飯。


鄭赤琰話，大聯盟由好多個親建制團體組成，佢哋會派出義工，為暑期工提供半個鐘頭訓練，教佢哋面對撐佔中人士衝擊時，點樣「打不還手，罵不還口」。呢份工待遇OK，Emily問大聯盟之後會唔會有類似兼職，鄭赤琰就話未必有，真係可惜。