張建宗自爆是新聞迷

【明報專訊】提起張建宗，大家第一時間諗起佢係勞工及福利局長，原來佢做過新聞主任，仲話自己係「新聞迷」，每日起身就會睇電視新聞。


張建宗喺最新一期《公務員通訊》，講1972年大學畢業後去政府新聞處做；到後來要離開新聞處，好唔捨得。佢仲話，喺新聞處最後一個崗位係海外聯絡編輯，工作可以擴闊佢嘅國際視野，同埋培養敏銳政治觸覺。


呢份敏銳嘅政治觸覺一直陪住佢，7年之後轉為政務主任，之後做到今時今日嘅勞工及福利局長。佢話，家每日未夠6點就起身，一路做運動，一路睇電視新聞，8點就進入作戰狀態，準備拼足12個鐘。不過，佢話自己雖然鍾意做嘢，但就唔係工作狂咁話。


至於平時有咩嗜好呢？原來又係睇新聞，張建宗話自己係不折不扣嘅「新聞迷」，唔會放過任何文字或電子媒體嘅精彩新聞評論、分析或文章。