南區區會：揀龍獅會審慎

【明報專訊】早排盛事基金贊助嘅香港龍獅節被審計報告批評帳目混亂，跟住立法會帳委會又調查事件。事件啱啱完結，南區區議會喺9月28號會搞「龍獅匯粹賀國慶」，今日開會討論。


預13萬請10隊

Emily睇過區議會文件，發現區議會已經留咗50萬畀龍獅匯粹賀國慶，撥款申請書列晒開支項目，將會用13萬請10隊龍獅同畀運輸費、道具錢，又有3萬蚊做公關費。活動召集人、南區區議會副主席陳富明話，南區區議會之前請過南區嘅龍獅隊，一隊都要一萬至萬二蚊，今年諗住請80人舞一條長300呎嘅龍。佢又話請公關公司係想將活動宣傳到南區以外，不過話3萬係小數目，唔知啲公司肯唔肯做喎。


Emily問陳富明驚唔驚變成龍獅節翻版，佢話揀龍獅隊時會審慎啲，睇吓表演內容同計劃配唔配合活動，會用評分決定請邊隊，仲話採購程序一向跟足政府做法。