阿里伙美影業 搞電視盒

【明報專訊】今時今日睇電視用「盒子」是常識吧！阿里巴巴本身都有個「天貓魔盒」，雖則喺香港就唔夠「小米盒子」咁出名，但阿里諗住大搞影視娛樂，隨時有機會爬頭。噚日，集團就同美國影業大亨之一獅門影業（Lionsgate）宣布合作，嚟緊畀內地嘅用戶，可以用最新嘅「天貓魔盒2」，睇獅門嘅電影同電視劇。


《飢餓遊戲》同《吸血新世紀》系列嘅電影，相信好多人都識，而獅門就係製片商。嚟緊天貓魔盒2就會有獅門嘅片睇，例如出咗一段時間嘅《飢餓遊戲2：星火燎原》同埋大型美劇《廣告狂人》等等。之不過，再次講到明呢啲片只係得內地嘅用戶睇到，香港用戶唔知幾時先用到個電視盒嚟睇。


阿里今年買咗文化中國（1060）之後，已成日出手搞影視業務。大家都知阿里上市搞得掂後，有千幾億喺手，話唔定整個「阿里活」撼美國嘅荷里活添。


[小琴密語]