盛智文做水上樂園顧問

【明報專訊】做咗海洋公園董事局主席11年嘅盛智文（Allan Zeman）「無得留低」，政府淨係預早1個月時間通知佢不獲續任，海洋公園董事局噚日宣布委任Allan做大樹灣水上樂園項目籌劃小組嘅榮譽顧問，等佢繼續出謀獻策，委任期3年。


榮譽顧問任期3年

不過，Allan未來只可以為水上樂園項目畀意見，其他營運問題都係會由新主席孔令成「拍板」。孔令成就話好期待再同Allan喺水上樂園項目上合作，又話佢對業界有豐富經驗同知識，加上對海洋公園咁有熱誠，相信水上樂園一定會好成功。