狗哥囡囡唔怕嘈 城市論壇瞓得着

【明報專訊】每個星期日嘅《城市論壇》一直都係唇槍舌劍嘅戰場，近年更多咗肢體衝突，但民主黨副主席蔡耀昌（狗哥）就無有怕，抱埋兩歲幾嘅囡囡去做觀眾。噚日天氣酷熱，更加發生「佔領嘉賓枱」事件，現場又嘈又混亂，但阿女仲可以瞓得着，社運界出身嘅狗哥果然係虎父無犬女。


周日要湊女 抱住做觀眾

狗哥話太太有事做，傭人姐姐放假，屋企無人照顧囡囡，唯有抱佢去城市論壇，佢話呢啲就係香港人嘅典型生活啦！唔怕混亂情况會嚇親阿女咩？狗哥話城市論壇整體都好和平，係有人嗌吓交。佢話香港人好珍惜言論自由，好需要一個好似城市論壇嘅空間發表意見，所以希望城市論壇一定要撐落去。Emily問佢係咪想順便身教，讓囡囡熟習吓香港嘅政治環境呀，狗哥話囡囡仲細，不過之前都帶過去反國教科遊行。


（楊康琪攝）